Llengues vives

El mes de Marzo llegó a Asturies con dos actuaciones xudiciales alredor de los derechos llingüísticos: una en clavu y otra na ferradura. El día 8 de Marzo conocíemos l’autu del Tribunal Constitucional español nel siquiera admitía a trámite la consulta sobre si l’artículu 4.2 de la Llei d’Uso y Protección del Bable/Asturiano contradecía los artículos 3.2 y 81.1 de la Constitución española. L’autu dexaba claro que la población asturiana tien el derechu a que comunicase col Principao n’asturllionés, masque apuntare tamién que l’alministración nun ta obligada a responder na mesma llingua.

La consulta sobre la Llei d’Uso remitíala’l xuez Miguel Ángel Carbajo Domingo, del Xulgao de lo Contencioso-Alministrativo nº 3 d’Uvieo. A la de xulgar la denuncia de Xurde Blanco, funcionariu del Principao d’Asturies al que se-y refugara nel 2007 un permisu pa operase por tar redactáu n’asturllionés, esti xuez realizó un autu d’interposición de la cuestión d’inconstitucionalidá nel que llegaba a afirmar que, de fallar el Constitucional a favor de la Llei d’Uso, el fallu diba ser estimatoriu pa la demanda del funcionariu.

Con too y con ello, el 24 de Marzo conocíemos la sentencia d’esti xuez, na que refugaba la demanda, acoyéndose a que l’autu del Constitucional nun entraba na supuesta diferencia ente ciudadanía y funcionariao y cualificaba, inclusivamente, l’actuación de Blanco como “de mala fe” y movida “por el único interés de interferir en el buen funcionamiento de la administración”.

Esta sentencia, contradictoria colos propios postulaos del xuez y criticada por colectivos y xuristas de mui distinta ideoloxía, muestra a les clares la persistencia de sectores militantes en contra de lo que suponga la más mínima normalización llingüística n’Asturies, lo mesmo que la posición d’un gobiernu del Principao que ta dispuestu a lluchar xurídicamente contra la concesión de los mínimos derechos llingüísticos que per otra parte diz defender cola aplicación y desenvolvimientu de la Llei d’Uso.

Asina y too, estes actuaciones xudiciales, mesmo la contraria a la llingua, tienen una llectura positiva. Pa lo primero, les denuncies xudiciales, una vía cásique ignota nel movimientu de reivindicación asturianu, empiecen a fructificar, y si desta algunos resultaos son negativos, siempre queda la posibilidá del recursu. Pa depués, mesmo la sentencia del xuez Carbajo tien un aquel de valor pa la reivindicación llingüística, yá que la introdución d’un criteriu p’almitir l’asturllionés na alministración, por restrictivu que sía esti, acaba cola arbitrariedá que guió l’actuación del Principao nestos últimos trenta años. Y pa rematar, la victoria mínima nel Constitucional abre’l camín pa reivindicar otros munchos puntos de la Llei d’Uso que, nel día presente, siguen incumpliéndose impunemente.

Ye cierto que parte del asturianismo nun lo supo ller asina. Hubo quien afirmó que, como’l Principao nun cumplía la Llei d’Uso, la única salida yera la oficialidá (nuna estraña falacia que presupón qu’una llei más respectuosa pa col asturllionés sí diba cumplise) y hubo quien aprovecho pa pedir otra vuelta la cabeza de Consuelo Vega, directora xeneral de política llingüística. Palabres d’orde que se reciclen una y otra vegada, pase lo que-y pase a la llingua. De xuro que la oficialidá ye un derechu irrenunciable y de xuro qu’hai que pidir responsabilidaes polítiques. Pero con ello, esperemos qu’haya quien explore tamién la vía de la denuncia xudicial, que tanta allegría pue danos nel camín.

Us ha agradat aquest article? Compartiu-lo!