Països Occitans

 ADIEU A ELÈNA GRACIA,COMUNICAT DE LA FELCO.                                  (prés del jornalièr audenc)
La FELCO avèm aprés amb emocion e tristessa la  despartida d’Elèna Gracia-Cabanas a l’edat de 91 ans.
Desapareis amb ela un tròç de l’istòria de la  lucha longa per l’occitan dins l’Educacion  Nacionala. Mestressa d’escòla tre las annadas 40, jà engatjada dins la practica de la pedagogia  inventada per Celestin Freinet, es lèu conscienta de l’importància de la presa en compte de la lenga dels mainatges, l’occitan dins sa region.
A la sortida de la guèrra, amb lo grop Antonin Perbosc, fòrma primièra de çò que serà puèi lo sector pedagogic de l’IEO, entrinca la mesa en plaça d’un malhum d’ensenhaires que sens esperar la timida lei Deixonne prova lo moviment en caminant, en despassant las empachas materialas  (abséncia a la debuta de manuals adaptats per exemple) e mentalas, en un temps ont per fòrça mond en dedins e en defòra de l’institucion, lo “patois” aviá pas sa plaça a l’escòla de la Republica.
Militanta occitanista, militanta de la pedagogia, militanta sindicala tanben, Elena Gracia aviá pas abandonat lo combat après sa retirada. Sèm quauques uns qu’avèm agut lo privilègi de la conéisser e de reculhir sos sovenirs.
Precària que precària, la situacion de l’ensenhament de l’occitan uèi es sens comparason  amb çò qu’èra quand Elena Gracia s’i engatjèt : a agut al fial de sa vida la satisfaccion de veire que son accion èra pas sens resulta, e per nosautres fa partida dels pionièrs que sens eles seriam pas ont sèm.
Saludam sa memòria, e la doblidarem pas. Semondèm nòstras condoleàncias a sos pròches.

Lo burèu de la FELCO.

Podèu trobar una entrevista amb Helena Gracia dinsel num. 41 de ”Lenga e País d’òc”
http://www.crdp-montpellier.fr/languesregionales/occitan/ressources/sceren/sommaire_n41.htm
========================================================