Esti mes de mayo, como ye tradición dende van yá trés decades, cellebróse la XXXI Selmana de les Lletres Asturianes. Del llunes 3 al sábado 8 d’esti mes, el gobiernu del Principao d’Asturies organizó una serie d’actos alredor de la lliteratura y centraos, los más d’ellos, na figura del poeta homenaxeáu nesta edición: l’escritor de Mieres Xosé Antonio García. Asina, el vienres 7, día del llibru y del discu n’asturiano, xunto cola compra de lliteratura o música nesta llingua –que tenía un descuentu del 10% sobre’l preciu habitual–, regalóse’l llibru Xosé Antonio García, un poeta nel fin de sieglu. Amás, anguaño editóse tamién, aprovechando xustamente esta selmana, la totalidá de la obra poética d’esti autor.
Les actividaes centránonse, sobremanera, na villa de Mieres, con presentaciones de llibros yactos pa escolinos. Ye interesante señalar la mesa redonda sobre Lliteratura asturiana, presente y futuro qu’organizó Radio Parpayuela de Mieres. Ellí, los autores Antón García, Xuan Bello, Xandru Fernández, Pablo Texón, Vanessa Gutiérrez y José Ángel Gayol debatienon sobre’l pasao, el presente y el futuro de la lliteratura desenvolvida n’asturllionés al norte del dominiu llingüísticu. Llama poderosamente l’atención constatar que les cróniques de prensa destacanon, d’ente les opiniones d’estos autores estremaos n’edá y en posicionamientos, la defensa de la lliteratura como daqué ayeno al conflictu político-llingüísticu que vive Asturias.
Otra manera, quiciabes ún de los actos institucionales que tuvienon más sonadía nos medios de comunicación y seguramente tamién el que destacó por ritualidá y simbolismo, foi la llectura pública institucional de testos n’asturiano cellebrada’l xueves 6 de mayo na Xunta Xeneral, onde diputaos y personalidaes de varios ámbitos procedienon a facer llectura pública d’un textu lliterariu. El reconocimientu de la lliteratura n’asturllionés aparez asina como independiente de los derechos de los falantes d’esta llingua, y l’acción de los más de los responsables políticos reduzse al xestu anual del rapsoda.
D’otra miente, como vien siendo habitual, el vienres n’Uvieo la Xunta pola defensa de la Llingua Asturiana convocó la so manifestación, qu’axuntó una bona riestra de colectivos sociales, partíos políticos y sindicatos. Esi mesmu día, l’Academia de la Llingua Asturiana acoyó como académicu al abogáu, d’orixe llionés, Nicolás Bartolomé Pérez –trátase del segundu llionés incorporáu a l’ALLA, dalgo que llama l’atención viendo’l discursu nacionalista / esencialista asturianu d’esta institución col gallego-portugués del Návia-Eu–. Nel actu académicu, amás, la presidenta de la institución vistía’l traxe tradicional asturianu, incidiendo, otra vuelta, na ritualización y simbolismo col que parez que siempre engalanen les instituciones asturianes too aquello que tenga que ver col uso d’una llingua n’Asturies que nun sea’l castellano: vistiendo a la llingua de pasao –mui asturiano, pero pasao– y otorgándo-y, quiciabes, poco espacio al futuro.
A lo último, quiciabes yera bono reflexionar sobre la falta de renovación d’esta selmana por parte de la sociedá civil. Anque probablemente que los más de los actos fonon organizaos institucionalmente puede xenerar una desidia social, propiciada, sin sitiu pa la duda, pola supuesta “normalidá” llingüística que caracteriza estos díes –sensación de normalidá, que nun taría mal recordar, bien de veces s’alimenta dende’l propiu movimientu de reivindicación llingüística–. De toes toes, taba bien echar un poco la vista p’abaxo, mirar humildemente pa otres sociedades y otres tierres y ver que, amás de compartir con elles l’idioma nel presente, compartimos tamién la pérdiga de llingua pal futuro. Qu’a veces, el grandonismo asturianu ta bien, pero n’excesu, acaba por neutralizanos políticamente. Y precisamente, como diz el dichu, nun tamos como p’andar trabayando pal inglés.
Us ha agradat aquest article? Compartiu-lo!