La campaña de Doi la cara pola oficialidá, activa tovía, supunxo una renovación importante na reivindicación de la oficialidá n’Asturies. Esta iniciativa ta organizada pol Conceyu Abiertu pola Oficialidá, una plataforma de la que faen parte organizaciones sociales, colectivos culturales y partíos políticos que, dende l’añu 2006, articula y coordina gran parte de les actividaes a favor de la inclusión de la oficialidá na próxima reforma estatutaria.
La dinámica de la campaña ye simple: consiste en retratase con una fueya na que pueda llese “Doi la cara pola oficialidá” y enviar la semeya pa colgala na páxina web. Pero el so fondu significa toa una revolución nel movimientu pola llingua. De primeres, porque ta siendo una campaña que llega y na que s’involucren sectores sociales que, xeneralmente, nun participen n’otres iniciatives sociopolítiques a favor de la oficialidá. De segundes, porque se sirvió de ferramientes nueves na defensa d’esta demanda histórica del movimientu asturianista, como la imaxe y internet pa esparder una demanda que, polo normal, namás tien presencia nes zones urbanes y nun tien repercusión acullá de les fronteres asturianes. A lo último, tamién ye de destacar cómo una campaña que nun necesitó munchos medios económicos pa llevase alantre, tuvo una repercusión mediática bona y consiguió apoyos importantes pa esta demanda política.
La iniciativa que se vien desenvolviendo dende l’añu 2008 tuvo un día de celebración, a lo postrero del mes pasáu, con una fiesta na Pola Siero, pa conmemorar los primeros 10.000 retratos. El día 28 de Noviembre hebo na villa polesa una montonera d’actividaes con bolos, xuegos tradicionales, cuentacuentos, una muestra de software llibre y les actuaciones de Toli Morilla, Anabel Santiago, Duerna, Panderetes de Fitoria y La Curuxa. La campaña de Doi la cara pola Oficialidá foi quien a retratar, por una llexislación llingüística equiparada nel reconocimientu llegal a la d’otres partes del Reinu d’España, a escritores como Xuan Bello o Carmen Gómez Ojea, a deportistas como los futbolistas Villa y Quini, el tenista Galo Blanco o’l ciclista Chechu Rubiera, a personaxes televisivos como Sonia Fidalgo y María Cotiello, o mesmamente a xente que se posicionara va años en contra de la oficialidá como la escritora Corín Tellado o’l cantante Víctor Manuel.
Ye pa emponderar cómo una campaña como esta foi capaz de romper les dinámiques endogámiques na reivindicación de la oficialidá y la poca repercusión social (tolo más una fueya na sección cultural de la prensa) de les manifestaciones anuales, asumíes yá totalmente pol establishment como inofensives y que cada añu sufren nueves pérdigues d’asistentes. Les más de 10.000 persones que dieron la cara pola oficialidá signifiquen, en cambio, aire nuevo y una mayor socialización pa la reivindicación d’esti pasu p’alantre de los derechos llingüísticos. Cuántes más cares pola oficialidá traiga l’añu nuevu, más cerca podrá tar la consecución d’una reivindicación histórica n’Asturies: la oficialidá.
Us ha agradat aquest article? Compartiu-lo!