Tot qu’ei prèst entara manifestacion deth 24-O en Carcassona. Dempús dus ans sense mani, enguan que se i cau tornar. Dissabte que ven, era vila deth Carcassés que serà eth centre, per dusau còp, dera reivindicacion occitanista, damb era prevision que i age mès gent qu’ena prumèra desfilada occitana conjunta de 2005, qu’amassèc a 10.000 persones enes murs dera ciutat medievau. Es coordinadors d’Anem Òc! (Institut d’Estudis Occitans; Felibrige; Federacion des Ensenhaires de Lengua e Cultura d’Òc o F.E.L.C.O.; Calandreta, escòles occitanes associatives laïques, e Òc-Bi, associacion de pairs d’escolans der ensenhament bilingüe public) que demoren, totun, poder superar es 20.000 participants de Besièrs 2007, entà poder hèr pression sus es elegits politics: locaus, regionaus e estataus, entà qu’amien accions tà adaptar era legislacion francesa as demandes occitanes.
Que vò èster ath madeish temps ua manifestacion ludicofestiva e
reïvindicativa, per aquerò era Crida entara manifestacion qu’a previst
activitats abans e pòstmanifestacion, com un mercat de productes
occitans, un repertòri de cançons d’un costat ar aute d’Occitània entà
que siguen cantades ath long dera jornada damb ua soleta votz pes
manifestants e tanben concèrts entara fin de hèsta damb Joan-Francés
Tisnèr, Claudi Martí, Eric Fraj e Los Pagalhós, entre d’auti. Deth
costat reivindicatiu, er objectiu prumèr qu’ei era reconeishença dera
lengua occitana, damb un estatut pròpi, per Estat francés, mès enlà
dera simpla reconeishença des lengües dites regionaus en article 75
dera Constitucion francesa. Qu’ei per aquerò qu’eth collectiu
coordinador reclame, en ua seguida de demandes que’s pòden concretar en
quate camps: mèdias, creacion, ensenhament e vida publica, ua plaça
legau dera lengua entà poder-la preservar; tad aquerò que cau, donc,
promòir un entorn favorable entar ensenhament dera lengua e ena lenga,
entara creacion culturau (musicau, teatrau, literària…) en occitan,
entà qu’er occitan sigue present enes mèdias electronics (internet),
àudiovisuaus (ràdio e television) e escrits, ena vida publica e sociau,
mejançant era toponimia, entà ajudar atau a encoratjar era transmission
dera lengua ena familha.
E arribarà dilhèu eth dia que pogam exclamar: libertòc, egalitòc e
fraternitòc? Peth moment qu’auem sonque era oportunitat de cridar fòrt:
Anem Òc! Per la lenga occitana!
Que’s pòt tanben signar era peticion en linha entà dar supòrt ara crida.
Mès info sus http://manifestarperloccitan.com
Us ha agradat aquest article? Compartiu-lo!
Al diari “Berria” han publicat la notícia de la maifestació, aquí al PB.