Una, que ye de contino á la usma respective d’o tema lingüistico en Aragon, ha empecipiato á detectar chicoz sinyals de cambio que indican que, a resultas de l’aprevacion d’a Lei de Luengas, cualcosa ye movendo-se, encara que mui timidament, en a sociedat aragonesa. Aquí en tenez bels exemplos.
No fa guaire, a consellera d’Educacion e Cultura d’o Guvierno d’Aragon, a sobrarbenca M.ª Victoria Broto, endreçó a los deputatos uns charraços en aragonés e en catalan, en o sino d’as Cortes aragonesas (yera la primer vez en a história d’a democracia que un miembro d’o guvierno aragonés feva servir as tres lenguas d’Aragon).
Més. A ‘Corporación Aragonesa de Radio y Televisión’ ha feito una campanya d’imágen emplindo lo mobible urbano de Zaragoça (no sé si en atras localidaz tamien) con o lema Es lo tuyo, en o que se planteya la disyuntiva entre una parola en castellano e una atra en aragonés: “¿Goloso o laminero?”, “¿Mojarse o chipiarse?”, “¿Viento o ventolera?” –en iste zaguer caso un més que discutible aragonesismo.
Per atro costau, diferents médios de comunicacion, como lo apalamastrau e conservador Heraldo de Aragón, u lo més permeable Diario del Altoaragón, han encomenzato a ubrir-se una miqueta á las notícias sobre as lenguas aragonesas, més que més, l’aragonés. Asinas, hemos puesto veyer (leyer) amplas resenyas d’as zagueras publicacions en a nuestra luenga, como lo bonico libret de devinetas altoaragonesas, Dovina, dovinalla, de Chusé Raúl Usón u lo erotico Luengas enreligatas, de Laura Dolç…
Mesmo lo Campus de Uesca d’a Universidat de Zaragoça fa pocos dias se sumó a la celebracion d’o ‘Dia Europeu de la Lengua Materna’, con presentacions de libros e una mesa-colóquio an que estió lo vice-consellero d’Educacion e Cultura, Juan José Vázquez, lo taute d’engegar lo desarrollo d’a lei.
Havria d’anyader una experéncia própia: fa bels dias una presona, imos a deixar-lo en ‘mui de dreitas’, me confesava que no iva a esmaletar de l’aragonés perque ‘ahora con lo de la Ley de Lenguas, es políticamente incorrecto…”. Ah, diaple de politica! Quasi trenta anyos negando a evidéncia, a realidat trilingüe d’Aragón, e ara, de buenas a primeras, en un verbo, toz veyen con millors uellos a riqueça lingüstica d’este país… Ah, diaple de politica…
E ye que a politica tiene istas cosas. Puestar que una lei como ista, pacata, aglariada, esbafata, sirva ta pa que s’empeciepien a posar es alacez d’a normalizacion lingüistica que á Aragon li cal. Caldrá seguir a la usma. Quí sabe as sospresas que nos aguardan en os venients meses!!
Us ha agradat aquest article? Compartiu-lo!