Tot qu’ei prèst entà ua manifestacion mès, enguan en Tolosa, eth dissabte 31 de març, dempús des manifestacions de Carcassona (2005 e 2009) e Besièrs (2007). Aguest viatge, totun, damb era de Tolosa, d’autes manifestacions que son previstes tath madeish dia ath laguens deth territòri exagonau en supòrt des autes lengües dera Republica qu’eth francés: en Aiacciu, Baiona, Perpinhan, Kemper, Estrasborg…
D’ençà dera prumèra manifestacion, ath delà dera importància de méter en practica e de poder visualizar ua accion comuna, era importància de hèr-se veir deth movement occitanista, sonque eth gòi d’arretrobar tanta gent de pertot Occitània en ua celebracion massiva e hestiva ja s’ac vau.
Es diferentes associacions e organismes convocants, IEO, Oc-Bi, Felco, Libertat, Felibrige… an lançat crides entà manifestar. De motius no’n manquen: eth principau, reclamar era oficialitat der occitan, era sua reconeishença constitucionau per Estat francés, era inclusion dera lengua occitana coma lengua dera escòla dera Republica… mès que’n trobaríem milanta mès, com es d’aguest anonim deth sègle XXI, que nomente un dotzenat de rasons entà èster presents en Tolosa:
“Per ela pr’amor es singulara, unica e divèrsa
Per ela qu’aparten pas a digun e qu’es de tots
Per ela qu’a mila ans de grandas e de petitas frasas
Per ela que va dels Aups als Pirenèus
Per la qu’a sonque lo poder de dire çò que sèm
Per ela que nos dona la paraula
Per ela qu’ocupa pas l’espaci mediatic
Per la qu’es pas dins los sondatges
Per ela qu’a pas agut de plaça a l’escòla
Per ela qu’es pas la candidata de digun
Per ela amb quala podem parlar autrament
Per ela que val pas ni mai ni mens que las autras
Lo 31 de març votarem per ela
Pr’amor nos farà pas cap de promessas mas las tendrà totas se o decidim nosautres
Votarem per ela amb nòstra votz
Votarem per ela amb nòstres pès per las carrièras de Tolosa!”
Eth dia 31, donc, cau èster fòrça entà cridar òc (e tanben sí, bai, etc.).
Us ha agradat aquest article? Compartiu-lo!