El próximu 22 de mayo tán convocaes elecciones autonómiques y municipales en tol territoriu falante d’asturllionés que pertenez administrativamente al Reinu d’España. El resultao que salga d’estos comicios va ser, con éstes, el cuadru onde puedan desenvolvese los derechos de los falantes pa los próximos cuatro años. Anque tovía nun s’abrió oficialmente la campaña electoral, sí llegó’l tiempu de reflexionar sobre delles cuestiones llingüístiques que tán presentes yá en debate.
N’Asturies, como vien siendo normal, la llingua parez que va ser ún de los temas que se tratarán nos programas y nes campañes de les distintes organizaciones polítiques, máxime cuando dellos partíos nuevos, sían o non favorables a la oficialidá, van facer por posicionase na órbita asturianista pa les elecciones. Con too y con esto, los dos partíos mayoritarios, PSOE y PP, mantienen la so oposición a la oficialidá del asturiano.
En Llión y en Zamora, ta por ver entovía si los debates últimos de la lexislatura van facer que los partíos con representación na Xunta introduzan referencies al asturllionés nos programas, anque fuera con midíes ruines, o si esta demanda política va quedar restrinxida, como hastasagora, al llionesismo políticu.
Lo que sí pudo vese yá ye que la conculcación de los derechos llingüísticos nun apara en tiempu d’elecciones, tolo contrario, puede dase con una agresividá mayor. Esti 20 d’abril, la Xunta Electoral de Zona de Llaviana decidía refugar les candidatures a los conceyos de Samartín del Rei Aurelio y Llangreo tanto de la coalición Bloque por Asturies-UNA como de Conceyu Abiertu. La causa: presentar la documentación n’asturiano. La decisión, contra la qu’estes organizaciones presentaron recursos, contradiz directamente la Sentencia 48/2000 del Tribunal Constitucional español. Amás, que la de Llaviana fuera la única Xunta de Zona que nun aceptare les candidatures por nun dir n’español evidencia la total arbitrariedá de la midida. Arbitrariedá que queda demostrada pola aceptación final de les candidatures.
Esta situación nun puede facese de menos. De primeres, muestra que la oficialidá que nun defenden los partíos mayoritarios d’Asturies sirve pa garantir precisamente estos usos en Reinu d’España. De segundes, proxecta dudes sobre qué fixeron nesti casu les demás organizaciones polítiques que supuestamente apoyen la normalización del asturiano (Izquierda Unida, Partíu Asturianista y, más recientemente, IDEAS): ¿por qué estes candidatures nun fueron refugaes? ¿Presentaron la documentación billingüe o namás en castellano?
Anque’l tiempu ye tovía d’expectatives, parez difícil que d’estes elecciones salga un arcu políticu favorable pal asturllionés, por más que pueda haber avances nello. La política parlamentaria, que ye necesario ver como un preséu más pa la defensa de los derechos llingüísticos, continúa siendo un espeyu de les miseries de la sociedá asturiana y llionesa pa cola llingua: si per parte del poder hai ataques constantes y indiferencia, notres partes topamos por veces un compromisu más retóricu que real. Dalgo que tendrá que mudar si queremos construír una situación nueva que nos permita vivir, a tolos niveles, n’asturllionés.
Us ha agradat aquest article? Compartiu-lo!