A mia colaboracion se ye tornata a reçagar. Pero en ista ocasion no ye estato per galvana u desíria; ye perque yere esperando que se celebrasen as eleccions d’o 22 de mayo. Per ixo escrivo en calient, agora, quan fa només dos dias qu’en Espanya se son celebratas as eleccions autonomicas e municipals, e o PSOE ha sufierto la estalapizada més gran d’a suya vida, es piors resultatos d’a suya história, esbaleyato d’o mapa politico per o PP, que, per cuentra, ha aconseguito es millors numbros electorals dende que fue fundato (lo menos ixo pareix).
Aragon tamien s’ha sumato a ixa mareya açulisca e en as tres capitals lo partito més votato ye estato lo PP, igual qu’en as Cortes d’Aragon, trencando ixa mayoria de centro-zurdas que historicament ha teniu.
Luisa Fernanda Rudi, sin mayoria absoluta se columbra como a nueva presidenta d’un Guvierno de centro-dreitas, que de seguras havrá d’emparar-se en ixa prostituta d’a politica aragonesa que ye o PAR.
Podemos decir alavez, sin garra duda, que a Lei de Luengas ye papel mullato. Asinas el veigo. Que o treballo d’o Consejo Superior de las Lenguas de Aragón –l’aprovacion d’o suyo Reglamento de Funcionamiento Interno e as Ordinacions d’as Académias (catalan e aragonés) e lo més important, a lista d’es nueu academicos que fue aprovata per dito Consejo a la espera d’a suya ratificación pel Guvierno– quedará en suspenso a partir d’agora. A lista se va filtrar ya fa dias e la podez consultar per Internet.
Ixo ye lo que nos tememos e con fundatas raçons. Rudi ya dició en plena campanya que yera bien en desacuerdo con ixa Lei e a o PAR ya sabemos que nunca no li fació mica grácia a propuesta d’o suyo companyero de Guvierno.
Nos tornamos a quedar con a miel en os morros. Sisquiera m’entivoque, pero as mullers gosamos tener un sexto sentiu.
O PP será o culpable? Lo’n será o PAR? Yo tiengo muito claro quí ye o taute d’iste zancocho: o PSOE e os suyos mainates, que per tres legislaturas ha puesto aprovar ista Lei y lo ha feito a la fin, colando-la per a gatera, en un momento muito difícil –més que més con a gran crisis economica– mientres que Marcelino feva mutis por lo foro.
As proximas semanas veyemos en qué remato tot isto, pero as vibracions son a saber qué malas. Me gosa mal.
Us ha agradat aquest article? Compartiu-lo!