Països Occitans

L’IEO-Lengadòc et l’IEO Erau, seccions regionala e departamentalade l’Institut dels Estudis Occitans, de declaran espantats per la decision del
tribunal administratiu de Montpelhièr de comandar la despausa dels panèls de senhalizacion que pòrtan lo nom de la comuna de Vilanòva-de-Magalona en
occitan. Se lèvan contra la volontat marcada per d’unes d’atacar la lenga naturala e amai originèla del país, lenga reconeguda per la Republica dins sa Constitucion coma part del patrimòni nacional.
 
Cal saique tornar dire qu’aquesta lenga es dotada d’un estatut oficial dins de regions occitanofonas fòra del territòri francés, en Itàlia, en Espanha, en particular dempuèi lo 22 de setembre darrièr dins Catalonha tota. Cal assabentar los que denegan lo drech de tornar trobar lo patrimòni toponimic e cultural local, qu’aquesta lenga  es estudiada dins las universitats de l’Allemanha a l’America e al Japon; lo congrés de l’Associacion Internacionala d’Estudis Occitans se tendrà a Besièrs al mes de junh que ven.
 
La cultura occitana e mai la lenga que la pòrta, al bèl contrari de l’intoleráncia e del sectarisme de lors detractors, son dobèrtas al mond e dobèrtas a totes – a totas las gents de bona volontat e d’esperit liure.
 
L’IEO que lucha dempuèi 1945 pr’amor d’aparar e de promòure la lenga e la cultura occitanas, es a l’origina de la campanha de senhalizacion bilingüa
per afortir la preséncia visibla de la lenga. Aquesta accion es estada menada dins Erau en acòrdi amb los servicis de l’Equipament ; es a tocar a l’ora d’ara un setantenat de comunas.
 
L’IEO es resolgut de menar la lucha per l’anullacion de la decision que tòca la comuna de Vilanòva-de-Magalona. Fa rampèl a los totes que son afogats d’un patrimòni vivent, d’una cultura a l’encòp dobèrta e enrasigada dins un país, per dire de se manifestar e a lo jonher dins aqueste combat.