El movimientu de recuperación llingüística nacíu n’Asturies alredor de Conceyu Bable, nos años setenta, foi siguíu nel tiempu, una década depués, polos inicios na revitalización del mirandés, al sur del dominiu. Estos dos polos, opuestos no xeográfico y nes pautes normativizadores quixeron ser, sobremanera nos años noventa, conectaos por un interés creciente pa col tema llingüísticu en Llión y Zamora. Con too y con ello, nestos territorios onde la situación sociollingüística ye muncho más precaria, la lluz de los movimientos de reivindicación mostróse débil y inconstante, hasta parecía que daba n’apagase a principios d’esti sieglu, acullá del trabayu, principalmente local, de los zamoranos Furmientu.
Si qu’así, tres una etapa de barbecho, ye nestos últimos años cuando empezaron a obtenese los frutos más esperanzadores. L’aparición de más de media docena de llibros, los más d’ellos de la mano de la editorial Filandón, cásique duplicó nos últimos dos años la lliteratura producío, en tola historia, d’esta parte del dominiu. L’asociación La Caleya recuperó dende 2007 los sos certámenes lliterarios, abiertos a tol dominiu, y les clases de llionés impartíes n’Estorga o en Ponferrada. Furmientu, amás de los sos concursos de vocabularios, reclamó la consideración de la llingua como Bien d’Interés Cultural de la comunidá castellano-llionesa. Y el I Cursu d’Encuestadores de Dialectoloxía y Toponimia en Zamora, organizáu de recién por El Teixu, abre’l camín pa una investigación seria y realista sobre la llingua nesa zona.
Nun ye pa tirar voladores la fuerza d’esti movimientu, ta claro. A la situación fráxil de la llingua pa esta parte ye necesario sumar la existencia d’un movimientu aisllacionista, con epicentru y poder políticu nel conceyu de Llión, que nun propón namás una concepción autónoma de la llingua, completamente apartada de los falantes reales, sinón qu’ataca y desprecia la reivindicación asturiana y cualquier tentativa autóctona d’averase a ella. Contra esti grupu alredor de Conceyu Xoven, de curtia actividá pero amplia repercusión mediática y cibernética, lo mesmo que contra la castellanización y invisibilización brutal de la comunidá autónoma, ye malapenes un airín lo que se llevanta nos grupos qu’en Llión y Zamora apuesten por una verdadera normalización.
Pero un airín que comienza a sentise: a les puertes qu’abre la inclusión del llionés nel estatutu d’autonomía (explicable como una concesión a UPL y el núcleu conceyuxovenista) podemos sumar una visibilización tímida del asturllionés n’ámbitos fuera de la simple reivindicación llingüística (por casu, na revista comarcal De Omaña o nes páxines del Diario de León) o la so cada vez mayor aceptación tanto n’ámbitos académicos como ente la sociedá en xeneral. El discursu sobre una llingua muerta y inventada, que yá tuviera que sufrir Asturies va años, empecipia a sumir tamién en Llión.
Nun se puede facer de menos la importancia d’esta zona central del territoriu llingüísticu. Nun hai qu’escaecer que la intermitencia d’esta foi la sida utilizada pa proponer en Miranda un camín normalizador separtáu del asturiano. El caltenimientu de la llingua en Llión y Zamora ye, asina, esencial pa servir de puente ente los dos extremos del dominiu y recuperar la llingua como vehículu de comunicación real ente tolos falantes. L’interés nel norte, pequeñu pero creciente, p’hacia estos territorios, tres años d’abandonu por parte del movimientu llingüísticu asturianu, permite tener una miga d’optimismu. Ente toos habremos de soplar pa que l’airín de Llión sía a aventar la incomunicación nel dominiu.
María Cueto i Iván Cuevas
Us ha agradat aquest article? Compartiu-lo!