A pesar de la globalización (o precisamente, por causa d’ella), la Bregancia de fala asturllionesa sigue siendo, pa los falantes d’asturllionés del Reinu d’España, el territoriu más desconocíu. La supuesta eliminación de les fronteres que traxera l’alcuerdu de Schengen nun fexo más fácil siguir la situación de la llingua ellí y, pongamos por casu, una noticia como la próxima publicación d’un llibru d’introducción al mirandés, ye bien posible que pasara desapercibida pa los más de los zamoranos, llioneses y asturianos interesaos pola llingua.
Con too y con esto, l’exemplu de Miranda y la so “oficialidá” ta permanente na boca de buena parte del movimientu de reivindicación llingüística. Una supuesta oficialidá que, por más que pueda ser útil esgrimir contra les polítiques glotófagues, en realidá nun pasa d’un “reconocimientu” poco mayor qu’aquel col que l’Estatutu de Castiella y Llión afuega al asturlllionés nesa comunidá. El supuestu pareísu llingüísticu mirandés ye, en realidá, un territoriu onde la llingua s’enfrenta, polo menos, a problemas semeyantes a los d’otres zones falantes, si non mayores, no que fai a la despoblación y falta de polítiques normalizadores.
Ello nun diz, ta claro, que nun haya exemplos a siguir nel camín mirandés. Ún d’ellos ta nes palabres que, d’un tiempu a esta parte, nun para de repetir Amadeu Ferreira, la persona que más trabaya pola normalización destá variedá asturllionesa: “El mirandés debía ser obligatoriu”. Estes declaraciones, de primeres, pueden parecer poca cosa, pero encierren l’enquiz de la situación política del asturllionés, tanto na Tierra de Miranda como nel resto del dominiu. Per un llau, demuestren que cola Llei que supuestamente reconoz y protexe’l mirandés nun llega. Per otru, materializa esa palabra que tanto teme dicir el movimientu de reivindicación llingüística: obligatoriedá. Cola Llei Wert amenazando nesti llau de la raya la precaria enseñanza de la llingua, y los esfuerzos asturianos dedicaos a caltener un sistema basáu nel aprendizaxe voluntariu, quiciabes nun taba mal garrar l’exemplu de Ferreira y, fuxendo de lo políticamente correcto, recordar que la obligatoriedá nel enseñu del asturllionés y nel so usu n’alministración son un pasu imprescindible pa revertir esti camín que llevamos hacia la extinción llingüística.
La profundidá qu’encierren les palabres, cencielles, d’Amadeu Ferreira, recuerden les d’otra persona clave na revitalización del mirandés, Manuela Barros Ferreira, que va unos años dicía: “Escribir «ll» y «ñ» seria una manera d’aproximar, d’un mou razonable, aceptable, el mirandés a la so ancestralidá asturllionesa”. Esta defensa, tímida pero importante, del unitarismo llingüísticu pasó daquella desapercibida, y probablememente llegaba tarde. La ortografía del mirandés, fecha a les carreres igual que-y pasara a l’asturiana, yá taba en marcha, y namás un esfuerzu futuru, global y compartíu, será quien de traenos esa unidá na diversidá que ye tamién esencial pa la sobrevivencia de la llingua. Equí l’exemplu ta quiciabes n’otra parte: en Llión pudo parase, afortunadamente, la secesión ortográfica y hoi les propuestes más avanzaes advoguen firmemente pola unidá.
Unitarismo y obligatoriedá nun son suficientes, pero sí completamente necesarios, na construcción d’un futuro pa la llingua asturllionesa. Habrá que dar más pasos nesi camín, siguiendo, anque sea pali que pali, güelgues mínimes como les que dexen estes declaraciones. Aprovechando tolos exemplos que, dende Miranda o dende otres partes del dominiu, ayuden a siguir tirando p’alantre.
PS: Esti día 14, na Universidá de Tokyo, yera almitida la tesis de Satoshi Terao, en xaponés, sobre la diversidá llingüística, qu’estudia principalmente el mirandés y l’aragonés, y que va ser lleída el 25 d’esti mes. N’esto tampoco ye la Tierra de Miranda mui diferente al resto del dominiu: tamién ellí la llingua ye obxectu d’interés internacional mientres los falantes vemos como esmorez.
Us ha agradat aquest article? Compartiu-lo!