Maugrat eth panorama de crisi e de pessimisme generau, de temps en temps que podem hestejar quauqua bona naua: ei eth cas des aniversaris. E aguest mes de març qu’auem era sòrt de poder hestejar tres aniversaris de mèdias en occitan: es vint-e-cinc ans deth Meddia aranés, de Catalunya Ràdio en Aran, eth prumèr aniversari dera version en linha de La Setmana e eth prumèr an deth Jornalet.
Eth Meddia aranés qu’ei un magazin radiofonic diari que mos ten pontuauments informadi de “tot çò que passe en Aran” permet saber es causes que passen en Aran e delà dera termièra politica, e gràcies ath sòn equip de professionaus -Lissa Escala, Jòse Badia e Jòse Antònio Bruna- e collaboradors, mos assabentam des nauetats en politica, salut, educacion, istòria, lengua, musica occitana, espòrts… Ath long d’aguesti vint-e-cinc ans eth Meddia aranés qu’a daurit tostemps era pòrta ara participacion activa des escotaires deth programa enes diuèrses seccions, com era tertólia, e enes concorsi que propòse setmanèraments. Que podetz escotar eth Meddia aranés sus es ondes de Catalunya Informació, cada dia, de 12 a 13h -e de 19 a 20h- o per internet.
Eth Jornalet, gaseta occitana d’informacions, que vedec era lum hè un an, eth 31 de març, damb motiu dera grana manifestacion pera lengua occitana de Tolosa, e entà aglutinar un canau comunicacionau panoccitan. Ath long de tot un an que mos a informat dera actualitat informativa occitana e universau… de Barcelona estant! -en un exemple evident qu’era lengua d’òc non coneish frontères- dera man de Ferriòl Macip e Jaume Clotet e mercés ara sua passion e esperit altruista. Ath delà des notícies pròpies, eth Jornalet qu’a sabut profitar era tecnologia digitau entà auferir, en madeish siti, era opinion de nombrosi collaboradors deth mon culturau e politic occitan, e daurís era possibilitat de respóner aqueres opinions a toti es sòns lectors, tanben auferís periodicaments un sondatge sus un tèma d’actualitat e er accès a blòcs en lengua d’òc.
La Setmana que neishec, dètz-e-ueit ans a, gràcies ara determinacion e trabalh deth sòn creador, David Grosclaude, damb era volontat de bastir un mèdia ara imatge d’Occitània, “dab la soa diversitat e la soa unitat”. Qu’auferís informacion generau, culturau, sociau, economica e politica d’Occitània e de tot eth mon, tostemps d’un punt de vista occitan. Ath cap d’aguest temps, e d’acòrd damb eth progrès dera tecnologia digitau, tà poder auferir contenguts interactius as sòns abonats, er equip de La Setmana -en collaboracion damb era Federacion Interregionala dels Mèdias Occitans- que creèc un jornau numeric que ven de hèr un an, e a on podem accedir tà informacions complementàries ara version en papèr: fòtos, àudios e vidèos damb es entrevistes e reportatges qu’ena version en papèr non podem visionar ne escotar.
Compliments tà toti tres e que vos pogam escotar e liéger, aumens, autanti ans!
Us ha agradat aquest article? Compartiu-lo!