Llengues vives

Y nun son sólo les instituciones centrales les qu’incumplen l’uso de la toponimia oficial. De la mano de la Conseyería d’Agroganadería y Recursos Autóctonos llegónos, a lo primero d’esti mes, la edición d’un mapa de les mares de la costa asturiana onde nun aparecen na forma oficial dellos nomes de llugar como Llastres o Lluanco. Ye importante señalar, amás, que los topónimos marinos nun son los patrimoniales, polo qu’esti mapa ayuda a perpetuar na cartografía una toponimia deturpada tanto nel ámbitu asturllionés, como nel gallegoportugués. Más tovía: los nomes de les mares presentes nesti mapa entren en contradicción colos que taben n’otra publicación oficial, el Mapa d’Asturies a escala 1:200.000, publicáu apocayá pola Dirección Xeneral d’Ordenación del Territoriu y Urbanismo y respectuosu, con mui poques excepciones, cola toponimia patrimonial.

A lo último, podemos señalar tamién l’aparición de nomes de llugar ensin correspondencia cola toponimia oficial  –y tampoco coles formes patrimoniales– en dalguna publicación reciente de l’Academia de la Llingua Asturiana –como por exemplu la forma deturpada Boinás, en cuenta de la patrimonial y oficial Bueinás, na revista Ciencies, publicación íntegra n’asturiano–. Anque pueda parecer anecdótico, esto denota una preocupación cada vez menor pola que foi una de les reivindicaciones históriques del asturianismo llingüísticu institucional.

Con too, la oficialización de la toponimia sí supunxo dalgún avance nos usos institucionales. Lo oficial utilizóse nes tarxetes censales pa les elecciones a cortes xenerales d’anguaño. Nesti cuadru, y como exemplu, sorprende que nun fuera usada siempre pola candidatura Izquierda Unida de Asturias – Izquierda Xunida d’Asturies: la izquierda plural nos envíos postales de propaganda electoral, lo que supón una gran contradicción colo defendío por esta formación na campaña.

Toos estos casos de deturpación toponímica y incumplimientu de la llei nun faen otro que confirmar que la sobrevivencia de la llingua y la toponimia asturiana depende, de primeres, de la voluntá política y institucional, y non sólo de la existencia d’una normativa llegal más o menos beneficiosa. Les lleis a les que garranos na defensa de la llingua son poco más que papel moyao ensin una sociedá civil que denuncie’l so incumplimientu y que faga por respectar l’asturllionés, primero de too, naquellos ámbitos onde tenga dalgún tipo d’influencia. La reivindicación, imprescindible, de la oficialidá, fixo a veces qu’escaeciéramos que la llegalidá favorable nun ye’l final del camín, malapenes un pasu más na llucha polos derechos llingüísticos.

Nota: En relación cola importancia relativa d’esta llegalidá, nes últimes selmanes producióse n’Asturies un ataque nuevu a la presencia del asturiano nes elecciones. Asina, como reproducienon varios medios, la formación política Andecha Astur tuvo problemas pa validar l’uso de papeletes n’asturiano, por más que la propia xurisprudencia del Tribunal Constitucional español tuviera del so llau. Finalmente, la Xunta Electoral Provincial tuvo qu’admitir la validez de les papeletes, pero inutilizándoles na práctica al nun tar presentes nos colexos electorales. Ye imprescindible tar sollertes y responder a toles agresiones. Porque, como diz el refrán asturianu, al descuidáu nun lu favorez la llei.

Us ha agradat aquest article? Compartiu-lo!