Damb tot un an per deuant, ara qu’ei eth moment de hèr eth bilanç lingüistic deth 2012 que viem d’acabar.
Ath delà des manifestacions: pera lengua occitana, en mes de març en Tolosa, es diferentes mobilizacions a favor dera escòla bilingua, tanben cau parlar, en sens positiu, dera adopcion per part de diuèrses collectivitats territoriaus de convencions e acòrds entà desvolopar era socializacion o er ensenhament dera lengua; des votacions de sosten a favor der occitan pes regions e departaments; deth trabalh hèt peth Congrès Permanent de la lenga occitana, de proposar diccionaris en linha, vocabularis especifics e ua basa toponimica, entre d’autes iniciatives qu’an d’auer continuitat en futur; perque, en sens negatiu, malerosament, de maishantes notícies que n’auem agut massa: entre es retalhades en mon culturau, era reaccion recentralizadora der estat espanhòu en matèria d’ensenhament, e era supression de places restacades ar ensenhament bilingue -occitan/francés- en exagòn, auem patit -e mos demore- un an dificil.
Era darrèra mala notícia -peth moment- qu’a estat era desaparicion der Infòc, er informatiu en occitan de Barcelona Televisió, dempús de catorze ans en antena, que servie entà apropar as occitanofòns dera capitau catalana era nòsta lengua e era realitat culturau occitana: es manifestacions de Carcassona, Besièrs e Tolosa, era Estivada de Rodés, era corsa Aran per sa Lengua, eth procès parlamentari e era posteriora aprobacion dera Lei der Occitan, etc, qu’auien estat matèria informativa enes catorze ans de vida der informatiu en occitan. Eth canau de television a allegat era crisi com eth motiu qu’a provocat era clausura des diferenti espacis informatius Info idiomes, qu’er Infòc n’ère un.
E tot aquerò en un contèxte legau favorable, a on er occitan ei lengua oficiau. Calerà demanar-se tà qué servissen tantes leis se non i a ne sòs ne, sustot, era volontat politica tà poder desvolopar politiques favorables entara nòsta lengua.
Demorem qu’es accions institucionaus e es campanhes de supòrt entar Infòc se concretizen ena tornada en antena der informatiu e deth sòn equip de professionaus coratjosi.
Us ha agradat aquest article? Compartiu-lo!