Era companhia aranesa Persones d’Aran entà Toti que ven d’estrear, per dusau an consecutiu, ua òbra de teatre en aranés dehòra der espaci lingüistic occitanofòn: dempús dera estrea, en mes de junh en Vielha, era òbra Qui mane ací? a estat representada en tres sessions en Barcelona, a on i a ua minoria occitanofòna importanta, e damb sostítols en catalan.
Qui mane ací? qu’ei ua òbra inscrita -com era prumèra deth collectiu: Qui sò jo?– en teatre de consciéncia, e qu’a, entre d’auti merits, hèr-mos a reflexionar sus era nòsta manèra de víuer, sus era nòsta libertat e sus aqueri elements que determinen es nòstes decisions: eth nòste judici, es prejudicis, es nòstes emocions… e de hè’c, en occitan, damb ua còlha de gent amateur -non professionaus dera dramaturgia-, qu’era majoria non an er aranés coma lengua mairau, que mos an hèt a víuer intensaments en cada session totes es emocions derivades dera reflexion que propòse eth títol.
Non podem sonque dar es gràcies as Persones d’Aran entà Toti, e ara sua directora, Pax Dettoni, per auer-mos desliurat, aumens per un moment, des nòstes cadees de cada dia.
E demorem qu’eth pas seguent sigue aumens ua representacion, tà un aute an, en madeish territòri lingüistic occitan mès dehòra d’Aran: Pau, Tolosa, Rodés… Alavetz que mos auram desliurat de d’autes cadees: des cadees mentaus que non mos dèishen veir mès enlà dera frontèra politica que mos an imposat es estats respectius.
Us ha agradat aquest article? Compartiu-lo!