3 de maig de 2012
0 comentaris

Acullá de lo público

Quitando contaes excepciones, les más d’elles nos inicios de la reivindicación llingüística n’Asturies, les campañes dirixénonse tradicionalmente a los poderes públicos, a los que se-yos exixíen midíes de protección y fomento del asturllionés (o del gallegoportugués d’Asturies). Les razones son obvies: a la incidencia más efectiva de la política llingüística pública súmase la mayor permeabilidá de los gobiernos a la presión social, al nun tener como únicu obxectivu la xeneración de plusvalía.

Sí qu’así, quiciabes los esfuerzos por influír nos poderes públicos reducieron cásique a la nada les posibilidaes d’actuar sobre otros sectores de la sociedá. Históricamente, la principal consecuencia negativa d’esto fueron les fuercies marafundiaes na formación de partíos políticos centraos no llingüístico, con escasa continuidá y una representatividá que mui poques veces dio pa entrar nes instituciones.

Pero agora, la situación política asturiana evidencia los problemas d’esta clas de reivindicación: pola conxelación de presupuestos, les  elecciones anticipaes, la incerteza na formación del gobiernu, o la investidura dun parlamentu incompletu. Esto fai pensar, pese a les promeses del gobiernu en funciones, qu’esti añu nun va sacase  la convocatoria de subvenciones pa la normalización llingüística. Y eso nun momento nel que los más de los sectores sociales nun reciben presión nenguna pa usar l’asturiano, lo que puede reducir la so presencia pública a niveles mínimos.

Con too y con esto, la reivindicación llingüística  tamién cambia. Yá falábemos na entrega anterior de cómo se reiventaben les organizaciones de defensa de la llingua.  Bona parte de los nuevos esfuerzos de grupos y individuos tan dirixíos a influír n’otros sectores de la sociedá asturiana ensin pasar pelos despachos del gobiernu, yá sea nempreses, neventos deportivos o nasociaciones

Con éstes, una de les mayores conquistes nesti sentíu pal asturllionés pasó cásique desapercibía pa los medios les últimes selmanes: La sección de la Corriente Sindical d’Izquierda (CSI) en Tenneco Automotive  obligaba a la empresa a aceptar una cláusula de fomento del asturiano y publicar el conveniu colectivu nesta llingua.

La noticia tien especial relevancia por dos razones. De primeres, pola empresa a la que va dirixida la reivindicación llingüística: una gran multinacional de capital estranxero, ensin más relación con Asturies que la localización d’una de les sos fábriques. Pero tamién por quien reclama estes midíes: un sindicatu y los trabayadores fabriles d’una empresa, fuera de los requexos nos que suel movese la reivindicación del asturllionés    .

Aumentar los obxectivos y la base social pa ganar fuercies ye per onde tien qu’andar la reivindicación llingüística. Exemplos como’l de la CSI abren un camín nuevu pa siguir.

Deixa un comentari

L'adreça electrònica no es publicarà. Els camps necessaris estan marcats amb *

Aquest lloc està protegit per reCAPTCHA i s’apliquen la política de privadesa i les condicions del servei de Google.

Us ha agradat aquest article? Compartiu-lo!