12 de març de 2012
0 comentaris

Llibru Blancu

Yera nel añu 1996 cuando la Xunta pola Defensa de la Llingua Asturiana publicaba’l Llibru Blancu de la recuperación y normalización llingüística. Daquella, esta publicación procuraba asentar les bases d’un proceso llargu, el de la recuperación llingüística, que conoció, probablemente nos años siguientes, unu de los sos periodos d’actividá más altu.

Pasaron yá quince años y esti tiempu xeneró unes necesidaes nueves  nel ámbitu de la recuperación llingüística, pero tamién sirvió pa desenvolver dalgunos de los obxectivos que s’apuntaben naquel trabayu. Por eso, cola llegada del XV aniversariu de la publicación del Llibru Blancu, la Xunta pola Defensa de la Llingua Asturiana organizó ente los meses de xinero y febrero una serie de meses-taller pa reflexionar sobre aquella publicación.

Anque solo fuera por eso, estes meses signifiquen una buena noticia pal asturllionés, si más non, porque manifiesten pasos nuevos y una voluntá d’actualización nun tiempu d’actividá y presencia pública baxes, onde la reivindicación parecía nos últimos años atascada na simple celebración de feches simbóliques. L’actualización del Llibru Blancu y, otra manera, la creación nestos meses d’una nueva organización en defensa de la llingua, Iniciativa pol Asturianu, denoten qu’existe una militancia que quier buscar nueves víes pa rellanzar la reivindicación llingüística.

Pero amás d’eso, ye evidente qu’estos 15 años, que vieron pasos históricos pal asturllionés (el nacimientu de Les Noticies, la creación de los servicios locales de normalización llingüística, l’iniciu de la oficialización toponímica…) reclamaben una actualización reivindicativa. Los debates organizaos pola Xunta, centraos sobre trés puntos básicos (educación, medios de comunicación y servicios de normalización llingüística, amás d’una mesa xenérica sobre recuperación y normalización llingüística) nun pueden ser, entós, más oportunos. Ente les conclusiones, podemos destacar una especialmente preocupante: la contradicción ente la mayor presencia y apoyu (tímidu) públicos con una caída, cada vez mayor de la transmisión patrimonial, nuna espiral que nun puede traer nada bueno al futuro del asturllionés.

Amás, la organización anunció la necesidá d’organizar talleres nuevos, teniendo en cuenta munches de les variables que caractericen a la sociedá asturiana actual. Esto supondría una necesaria ampliación del horizonte reivindicativu asturianu, que, pola negativa casi sistemática de los poderes públicos, terminó cásique refuxáu en determinaes palabres d’orde (oficialidá, bable nes escueles, tolos pueblos col nome popular…). Nos debates próximos podríen incluíse temas tan importantes como la demografía –una de les variables poco contemplaes tradicionalmente n’Asturies–, la producción cultural escrita o audiovisual, los movimientos de reivindicación llingüística o la continuidá del asturllionés.

A riesgu de remarcar lo evidente, quiciabes hai una perspectiva más que parez esencial nesti tiempu: lo económico, que repercute de manera afaradora sobre la normalización del asturllionés. Si bien hubo, nestos 15 años de Llibru Blancu, avances tímidos pero constantes pa la llingua, la precariedá (institucional, llaboral, económica…) amenaza con echar abaxo too aquello que foi tan difícil construír. Yá cayeron les primeres víctimes de la crisis económica: el 3 de febrero salía a los quioscos la última edición impresa del selmanariu Les Noticies, y l’Asociación de Trabayadores de la Normalización Llingüística lleva tiempu denunciando el cierre de servicios de normalización llingüística pola falta de compromisu de los conceyos y la inestabilidá de los puestos de trabayu. La reducción de fondos pa Política Llingüística, acentuada tovía más pola conxelación de los presupuestos, anuncia tamién un futuro difícil. Namás los movimientos sociales serán d’evitar qu’aforrar nel asturllionés sía la opción fácil pa los distintos gobiernos. Y parez qu’empiecen a movese. Que sía pa lo meyor.

Deixa un comentari

L'adreça electrònica no es publicarà. Els camps necessaris estan marcats amb *

Aquest lloc està protegit per reCAPTCHA i s’apliquen la política de privadesa i les condicions del servei de Google.

Us ha agradat aquest article? Compartiu-lo!