Ixo e o nuevo guvierno autonomico en mans d’o PP, que deixa en via muerta a Lei de Luengas, o ‘Consejo Superior de las Lenguas de Aragón’, as Académias de l’aragonés e o catalan, e que nos nínvia dreitos a la dura realidat: asociacismo troixato en bandotas e capilletas e quantas propuestas ortograficas, e poquetas ganas d’asentar-se arredol d’una mesa per parte de toz pa apanyar-lo.
Ixo e as zagueras declaracions d’o Director General de Cultura d’o Guvierno Aragonés, o sinyor Humberto Vadillo, descalificando a la gent d’a cultura en general (’titiriteros’) e fendo-se-ne a mofla d’as luengas minoritárias d’Aragon, aragonés e catalan.
Vadillo ye més malo que una pedregada: hombre proximo a la FAES d’o ex-president Aznar, colaborador de Libertad Digital e atros médios afins. Ye como meter un lupo a cusirar l’arramata.
No ye estato guaire encertato lo nombramiento per la nueva flamiente consellera d’Educacion, Universidat, Cultura e Esporte, a catalana María Dolores Serrat Moré, a la que yo, muito ingenuament, per ixo de venir de tierras catalanas, li suposava una miqueta de nivel cultural e respeto a las culturas chicotas. Per ixo, a resultas d’as suyas ‘sinceras’ declaracions una colla de personalidaz d’a cultura aragonesa publicó un anúncio pagato en El Periódico de Aragón demandando la suya dimisión, que no ye que a coda d’una campanya qu’encomencipió en o rete social de Facebook, ‘Vadillo dimisón’, e que conta ya con més de 1000 miembros.
Personalment pienso que ya ye hora de d’apetazar as viellas nafras e recuperar a unidat en o movimiento de defensa d’as luengas aragonesas, més que més en l’aragonés, e sumar voluntaz e fuerças, perque nos cal.
Con tot e con ixo, una chicota notícia nos fa encarar con bellacosa d’esperança este duro agüerro, a creacion d’un diploma d’especializacion en Filologia Aragonesa tos este curso academico e que se va a impartir en o Campus Universitário de Uesca. Se trata d’un buena ferramienta pa formar a mayestros, profesors, educadors, traductors.
Una buena oportunidat pa tener gent formata e que remata con un gran forato que tenévanos en ixe campo. Agora caldrá emplegar-lo e fer-lo servir con tiento.
Per qué? En qué se diferéncian las suyas declaracions d'es vuestros articulos Puro humo u Qué lengua aragonesa? http://sites.google.com/site/sociedat/articlos
Es enemigos de l'aragonés somos nusaltros mesmos. A vier si a la fin troballamos toz juntos, que ya hemos fatiato pro estos zaguers anyos.