Que á l’aragonés le cal una autoridat, una Académia, en matéria cientifica, que normativice, e lo més important, que i meta orden en o mundo de l’aragonés, ye indudable. Buen exemplo en ye que as mias colaboracions aquí en LLVV son as que més comentários e debat gosan generar entre os lectors.
Que Nagore ha treballau arrienda dinguno no lo discute. Cal recordar que fue él qui empecipió á bufar os calivos de l’aragonés, allá per los setanta d’o sieglo pasato (fote, cómo sona ixo!!). Como tapoc no se discute lo treballo feito per lo Consello d’a Fabla Aragonesa (e atras asociacions) en toz estes anyos, pero caldrá deseparar una mica lo grano d’a palla, lo que s’ha feito bien e lo que ha estau un fiasco u bel concieto personal. Per ixo, a lo modelo e á la ortografia proposada (e que tanto s’encerrina en defender como unica via posible p’a salvacion de l’aragonés; él e es que le siguen) cal dar-le un buen meneyo. No se trata de salvar o mobible per que sí, caldrá fer una buena porga, pasar ‘a fabla’ per un buen cetaço. Igual como ha sucedito en atros procesos normativizadors de parlas subordinadas, posando en quarentena u eliminando de facto lo que siga menister. Que as suyas tesis son ara en minória ye bien vistero: buena preva en ye o resultau d’o II Congreso de l’Aragonés, an que as suyas tesis e posicion quedon en minoria –per no decir que le dion a palleta.
Per atra man, l’autoridat (!) que diz que surtió d’ixe II Congreso, l’autodenominada Académia, no deixa d’estar una colla de gent con buenas intincions e poca formacion, triada de forma asambleária entre un centenar de personas. Quántos son filologos, quiero decir, filologos de verdat, con monografias publicadas, treballo de campo, articlos en revistas especializatas? E quántos son aficionaus, buens u malos aficionaus? E representan á’s patrimonials? En qué percentage? E qué entendemos per un parlador patrimonial? Yo, que naixié en Barcelona, e que lo aprendié de nina d’a boca escaixalata de lola, lo’n soi?
Només l’Académia que salga d’o ‘Consejo Superior de las Lenguas de Aragón’, que ha d’estar conformada per lo millor de lo milloret, tendrá ganau lo títol d’oficial, u á lo menos contará con lo refirme y apoyo d’o Guvierno d’Aragon.Y cada uno de nusatros y nusatras havrá de decidir qué fa: si acatar as suyas decisions u continar con estas pezquinas y escapelas de pátio de colégio.
Pero, claro, pa que ixo acurra havremos de tener una miqueta de suerte pa que se creye ixa Académia e os suyos miembros sigan eslegius con tino. E que os fados nos sigan propícios en as proximas eleccions autonomicas.
A cosa ye que dende que se creó ista autodenominada Académia no ye estada reconoixida per o Guvierno d'Aragon, ni per a Universidat de Zaragoça, ni per a nueva Lei de Luengas, ni per garra partiu:
que dengun fació mencion pa que se les reconoixese como autoridat lingüistica.
En istos anyos o suyo treballo ye estau nulo fueras d'as presentacions por lugars: qué treballos cientificos u de campo han publicau? qué congresos han organizau? qué libros han publicau? Quatre anyos da pa muito. E no les ha vagato que uns quantos se'n fuesen d'academicos.
No soi mica d'acuerdo en que Nagore salise en minoria d'ixe Congreso. A ixe Congreso podeva apuntar-se qualsiquiera que querese, ye més, una asociacion zaragoçana apuntó a buena cosa d'os suyos alumnos d'os cursos d'aragonés e como congresistas votoron en as votacions. E rai! igual se'n dava. O mesmo valeva o voto d'un que ha treballato siempre per a luenga que un alumno d'un curset! Asinas se fan as académias?
Sinyora Virgínia, quí ye en minoria en a romanistica e en o campo cientifico internacional, ye decir, a quí se conoix més per o suyo treballo, a Nagore/Vázquez u a M. Castán?
te deixo el vinclo, por si quiers mirar-te-la.
http://www.academiadelaragones.org/biblio/PROPUESTA%20ORTOGRAFICA%20ACAR.pdf
Sobre o de que ta qué fer-la agora que ya i hai lei, a respuesta ye, ta yo: por qué no s'habría de fer publico o suyo treballo de tres anyos (feito entre que no se veyeba brenca platero que fuese a existir nunca ixa lei) com mandato d'ixe congreso?
Yo la veigo como una lechitima propuesta a la sociedat de parladors de l'aragonés, y ¿por qué no?, a publicación d'os resultaus de tres anyos de treballo, por si fa honra a las administracions y entidatz que podesen tener una lechitimidat d'os poders publicos, si ye que nunca se plegan a constituir.
Como decitz, si se fesen as cosas como cal, i habría luego una academia de carácter oficial (creyada por o Gubierno). Y ista, si plega a estar operativa, tendrá que fer o suyo treballo dende zero, u treballar dende as propuestas existents, y trobar os suyos propios consensos (de no estar que siga monolitica, pero en ixe caso, ya dudo que ixa lechitimidat administrativa se corresponda con una lechitimidat social)...
Pero entremistanto, y entre que ixo sucede, si nunca sucede, o Estudio de Filolochía Aragonesa - Academia de l'Aragonés, constituye a entidat con mayor consenso dentro d'a sociedat aragonesofona, con ixa lechitimidat salida d'ixe II Congreso.
En o Congreso se votó una lista an que apareixeban os siguients nombres: José Antonio Saura, Francho Nagore, Chusé Inazio Nabarro... Toz els hevan dito clarament que no querevan fer parte d'ixa nueva asociacion. Manimenos os suyos nombres apareixeban en a lista.
Charras d'a parte cientifica d'o Congreso. Sabes quí fue qui trayó a toz os profesors europeus e de tota la Romania? Quí fue o responsable? Quí parló con els? Pos sí, o sinyor Nagore. No fue Castán, a qui no conoix dengun en as universidaz eurpeas. E sí, Nagore ye un autoritario, pero o que se vido ixos días fue muitos más Nagores, pero, ixo sí, sin ciéncia ni cosa. Ixe ye o problema d'o mundet: o protagonismo, e decir yo sé més que no tu.
Ubramos os uellos no havrá tanto consenso en ixa "Académia" quan dende a suya creacion tres miembros se'n han iu, no? Y no son qualsiquiera. Tamién ye culpa de Nagore?
Nos puez decir quantos patrimonials han feito alegacions a ixa nueva grafia? u pregunta-les-ne a os de l'"Académia" a veyer qué te dicen.
En leyer as actas (publicas) de "Chuntos por l'Aragonés", a comisión organizadera d'o congreso, se vei que a proposa de FN yera en primeras de fer una academia chicota con poquetz nombres (y d'a suya "cuerda"), y dimpués, en veyer que ixo no sería acceptau, cambio o suyo pareixer ta una posición como que no s'heba de creyar garra academia en ixe congreso.
As discusions en o congreso no fueron sobre modelos lingüisticos, fueron sobre qué caleba fer en ixe inte. As discusions sobre ixos modelos se deixaba ta ixa autoridat lingüistica que se i creyase (si se i creyaba) a on a os que queremos l'aragonés hésenos quiesto que i estasen totz, y que astí dentro se prenesen ixas decisions.
Si a SLA hese estau en o congreso y s'hesen posicionau de conchunta con o CFA en contra d'a creyación de l'Academia, talment as cosas hesen estau más achustadas y no hese saliu (u hese saliu sin guaire lechitimidat). Si s'hese posicionau a favor, y sobre tot, si os miembros "nominaus" hesen accediu a estar-ie, l'Academia hese estau millor (prou que sí), y soi seguro que as suyas posturas habrían complegau muitos consensos.
Porque s'alentaba a necesidat de cambios, pero cambios por acuerdos y no pas por decisions unilaterals.