Pècs, hula-hòp e Sietes
Coma cada ser ad aguesta ora, sagi de guardar eth Telenotícies de TV3 e tròbi, çò de madeish en toti es mejans comunicacion, non se hè bon jornalisme, es notícies que se presenten non arresponen cap es qüestions principaus. Hè quauqui dies, pendent es telenotícies parlauen sus es marrits pirates de Somalia que sequestren vaishèths espanhòus, Titot mos plantejaue en son blòg ua qüestion que cap mejan non sometec: qué putes i hège un vaishèth espanhòu en pescar enes aigües de Somalia? Qu'ei a díder, damb quina autoritat explotauen es recorsi d'un país deth tresau mon?
Pòrti ua setmana en tot pensar en fòrça eveniments que se debanaràn aguesta dimenjada. Que serè present ena manifestacion entara lengua occitana en Carcassona, e pr'amor d'açò non poderè pas èster en Correllengua deth mèn barri Sants, ne tanpòc ena presentacion dera CUP en Barcelona, en CAT.
De hèt, en tot campar un shinhalon pes portaus de notícies deth hilat, òm pòt remercar que i a un pialèr de notícies interessantes. Non sabi per qué putes es telenotícies deuen degalhar recorsi e temps entà ensenhar-mos com dance damb eth hula hop era hemna de Barack Obama.
Totun, çò que mès m'a frapat enes notícies d'aué, qu'ei eth spòt que Microsoft premanís en vilatge asturian de Sietes entà per'mor de presentar eth nau sistèma operatiu Windows 7. Era locucion, sense cap de vergonha, explicaue era coïncidéncia deth nòm deth pòble damb eth numèro deth sistèma operatiu.
De contunh b'è pensat, qu'era etimologia de Sietes deu vier der asturian e non pas deth castelhan, e atau ac è cercat ena Toponimia Asturiana de Xose Lluis García Arias, consultabla en hilat. Evidentament non a arren a veir damb eth numèro 7.
Cada viatge que vedie es notícies clamaue en tot pensar: e se pensen qu'èm pècs, o reaument ac èm? Aué que m'è començat a preguntar, qu'es que mos endoctrinen ja son pècs. Ja arrés non enganhe ad arrés, mès que viuem toti amassa ena mès prigonda ignorància. E atau ja mos va ben.
Er escurantisme medievau ja non ei present, mès er esperit classic de qüestionar-se es causes, origina dera filosofia, e alavetz dera sciéncia e eth saber, b'ei encara inexistent.
